بيىل «ۇزدىك مەكتەپ» اتالىمىندا №3 مەكتەپ-گيمنازياسى جەڭىمپاز اتاندى. ال «ۇزدىك مەكتەپ الدى دايارلىق ۇيىمى» — №37 «ارمان» بالاباقشاسى; «ۇزدىك قوسىمشا ءبىلىم بەرۋ مەكەمەسى — بالالار كوركەمسۋرەت مەكتەبى; «ۇزدىك كوللەدج» — گۋمانيتارلىق كوللەدج; «ۇزدىك ارنايى ءبىلىم بەرۋ مەكەمەسى» اتالىمىمەن №1 پسيحولوگيالىق-پەداگوگيكالىق تۇزەۋ كابينەتى ماراپاتتالدى.
سالتاناتتى شارا «ەل بولاشاعى – بىلىمدە» اتتى مەرەكەلىك كونتسەرتكە ۇلاستى. جىلداعى داستۇرگە ساي بىرنەشە اتالىم بويىنشا استانا اكىمىنىڭ گرانتى تاپسىرىلدى.
ء«ار ادامنىڭ ومىرىندە مەكتەپتە ون ءبىر جىل بويى ءبىلىم نارىمەن سۋسىنداتقان ۇستازداردىڭ الاتىن ورنى ەرەكشە. سىزدەر استانانىڭ, جالپى قازاقستاننىڭ دامۋىنا, ۇرپاق تاربيەسىنە ۇلكەن ۇلەس قوسىپ كەلە جاتىرسىزدار. قالا اكىمدىگى دە جىل سايىن ءبىلىم بەرۋ ۇيىمدارىن قارجىلاندىرۋدى ۇلعايتىپ كەلەدى. ماسەلەن, بيىل بىلتىرعىعا قاراعاندا, ءار مەكتەپتىڭ بيۋدجەتى ەكى ەسەگە ءوستى. مەكتەپتەر روبوتوتەحنيكا سياقتى جاڭا زامان تەحنولوگيالارىمەن جاراقتاندىرىلۋدا. كەلەسى جىلدىڭ اياعىنا دەيىن بارلىق ورتا ءبىلىم بەرۋ ورنى «سمارت مەكتەپكە» اينالادى. ءار سىنىپقا Wi-Fi جۇيەسى تارتىلادى» دەدى ۇستازداردى استانا اكىمىنىڭ اتىنان قۇتتىقتاپ, گرانت تاپسىرعان قالا باسشىسىنىڭ ورىنباسارى ماليكا بەكتۇروۆا.
قر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتى باسشىسىنىڭ مىندەتىن اتقارۋشى ەرسايىن ەرجان ۇستازداردى سالا ءمينيسترى اتىنان قۇتتىقتاپ, ءبىر توپ مۇعالىمگە «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» جانە «ى. التىنسارين» توسبەلگىلەرىن تاپسىردى.
سونىمەن قاتار نازارباەۆ زياتكەرلىك مەكتەپتەرىنىڭ تاجىريبەسىن جانە جاڭارتىلعان ءبىلىم بەرۋ مازمۇنىن, حالىقارالىق ءبىلىم بەرۋ ستاندارتتارىن ەنگىزۋدە اۋقىمدى جۇمىس جۇرگىزگەن 19 ەلوردالىق مەكتەپ ماراپاتتالدى.
